Авыл карты

Шомырт, сирень арасында

Йорт тора – бүрәнәдән.

Телевизоры күренми, –

Антенна көйләнмәгән.

Анда ялгыз бабай яши,

Тормышы көйләнмәгән.

Карчыгы үлеп киткән дә,

Ул кабат өйләнмәгән...

Коймасы – гади тактадан,

Капкасы – бүрәнәдән.

Монда низаглар чыкмаган,

Көфер сүз сөйләнмәгән.

Үз тормышы. Зур дөньяга

Үзенең карашы бар.

Болай боек та түгел ул,

Тик йөрәк ярасы бар...

Узган-барганга ачык ул,

Фикере җыйнак, кыска.

...Һаман карчыгын сагына, –

Мохтаҗ ул якын дуска.

"КУ", 11, 2018

Фото: pixabay